E seguindo cunha semana moi prolífica, hoxe temos un episodio moi especial. Case case en riguroso directo, sen cortes, a nosa rapazada asomouse ao que pode ser o mais parecido a unha radio convencional. Todos e todas prepararon a súa intervención, e déronnos unha pequena charla acerca de que hábitos debemos seguir para levar unha vida saudable. Micros abertos, moito respecto polo traballo dos seus compañeiros e compañeiras, e tamén, porque non dicilo, bastantes nervos!!!

Con moito orgullo compartimos convosco a nosa última sesión, esperamos que a disfrutedes como nos o fixemos gravándoa!!!

Nesta ocasión cambiamos de rexistro para abrir os micrófonos a unha conversa moi especial. O alumnado preparou con moito agarimo unha entrevista a unha cociñeira profesional que cada día pon sabor, coidado e humanidade no seu traballo nunha residencia de persoas maiores.

A protagonista deste episodio non só comparte connosco os segredos da súa profesión, as historias da cociña e a importancia dunha boa alimentación, senón tamén unha conexión moi especial coa nosa radio: é familiar dunha das nosas locutoras. Iso converte esta entrevista nun encontro próximo, emotivo e cheo de autenticidade.

Será pois un episodio cociñado a lume lento, con preguntas preparadas con ilusión polo alumnado e cun ingrediente imprescindible: o afecto.

Hoxe temos, na Voz do Eusebio, un episodio no que imos falar de pirámides. E non nos referimos as famosas pirámides exipcias de Keops, Kefrén e Micerinos, senón as pirámides alimenticias. 

Compararemos a pirámide que estivo vixente ata o 2025 e a nova, que está diseñada desde o 2026. 

Así pois, arranca un novo programa no que poderemos aprender que alimentos son mellores e peores para a nosa saúde. Alá vamos!!!

Hoxe, no novo episodio da nosa radio escolar, traemos un programa moi especial… e moi saboroso! Nesta ocasión, por aclamación popular dos nosos locutores e locutoras, dedicamos todo o espazo ao humor gastronómico, cunha selección de chistes relacionados co mundo da comida.

Ao longo do programa escoitaredes bromas protagonizadas por froitas, verduras, pratos e sobremesas, nun menú cheo de enxeño e risas, e moitos xogos de palabras. Un episodio pensado para pasalo ben, desconectar e demostrar que a creatividade tamén pode estar na cociña… e no humor!

Agardamos que desfrutedes tanto escoitándoo como nós desfrutamos preparándoo.

Bo proveito… e pasádeo ben!

O equipo de radio escolar preséntanos un novo programa no que os nenos e nenas se mergullan no mundo da gastronomía galega. Nesta ocasión, transformáronse en chefs e locutores para dar vida a un restaurante imaxinario cun menú cheo de tradición e sabor.

Para comezar, propoñen uns entrantes moi nosos: empanada e un reconfortante caldo. Como primeiros pratos, non podían faltar os exquisitos percebes e o clásico polbo á feira. O prato principal chega da man dunha deliciosa pescada á galega, fiel reflexo da nosa cociña mariñeira. E para rematar, dous doces irresistibles: milfollas e a tradicional tarta de Santiago.

Un traballo feito con ilusión, creatividade e moito orgullo pola nosa cultura, que vos convidamos a descubrir e saborear a través das súas voces.

Este ano preguntámonos: por que non participar no Concurso de Podcasts, agora que estamos comezando a facer as nosas propias gravacións? Pensamos que podía ser unha maneira estupenda de practicar, aprender e pasalo ben.

Así que puxémonos mans á obra… e ata trouxemos ao grupo de pandereteiras do cole, para añadirlle un maior valor ao noso podcast e para que participasen máis nenas e nenos do centro.

O tema que escollemos ten moito que ver coas Letras Galegas deste ano, adicadas a Begoña Caamaño, unha autora moi coñecida pola súa defensa da igualdade entre homes e mulleres.

A experiencia foi fantástica. Aprendemos moitísimo, traballamos en equipo e, sobre todo, gozamos moito facendo radio. Ao final, o de menos é o premio!

 

E aínda que xa pasou, falemos do Entroido!!!

Hoxe mergullarémonos nunha das festas máis divertidas e cheas de cor do ano: o Entroido. Ao longo deste programa falaremos das tradicións máis representativas da nosa terra, e descubriremos tamén como se celebra o Entroido noutros lugares do mundo, desde o famoso "Carnaval de Río de Janeiro" ata o de Venecia. 

Ademais, aproveitando o noso PDI “Saboreando o Mundo”, non podería faltar un percorrido polos pratos típicos do Entroido, tanto en Galicia coma noutros países. Falaremos de delicias tradicionais galegas como o cocido pasando tamén por receitas propias doutras culturas nestas datas festivas. 

 Preparade os oídos… e tamén o apetito, porque comeza unha viaxe chea de tradición, cultura e sabor!